政情：鄭泳舜補選狂拍千條宣傳片
選舉唔可以單靠傳統派傳單或喺交通工具登廣告，而要喺網絡上花啲工夫。好似參加咗今年三月立法會九龍西選區補選嘅鄭泳舜，佢申報喺今年一月十五日至三月十一日期間，拍咗一千條video，平均每日要拍近十八條，都咪話唔誇張！而喺Facebook最吸睛嘅宣傳片就係同前港姐鄺美雲合拍嘅推動動物友善政策，有一萬九千人次睇過。
鄭泳舜喺今次選舉就用咗約一百三十八萬八千元，由佢所屬嘅政黨民建聯全數捐贈找數，當中大部分都係印小冊子、海報、傳單、搞造勢大會等傳統工夫，而呢一千條video只係總值五千元，計咗喺租用三個民建聯九龍城支部嘅開支入面，而實際上租用辦公室仲會用嚟管理Facebook、Whatsapp等，所以video並唔需要用足五千元咁多，真係低成本高效益喎。
哪吒吸金力強
至於參加新界東補選嘅方國珊（哪吒）就用咗九十九萬七千元，以獨立候選人嚟講呢個數字非常高，唔通佢真係用晒自己啲姑婆本？不過睇真啲，哪吒雖然使費高，但收到嘅捐贈都高，淨係眾籌都有四十五萬六千元，加上另外個別人士捐助又收到四十七萬三千元，加埋成九十三萬元，睇嚟佢嘅吸金力都好強，如果再向政府申索選票資助，根本就一蚊都唔使畀，又使乜嘢擔心用晒啲姑婆本吖！