政情：藝術品似山墳發展局補鑊急拆
香港曾被視為「文化沙漠」，同藝術完全攀不上關係，但依家藝術氣息愈嚟愈濃厚，藝術裝置隨處可見。葵芳興芳路與興寧路交界最近多咗件大型「藝術品」，但可惜被網民嘲笑似山墳，形容為「地區小白象」。殊不知，原來街坊發功更強，當區區議員兼立法會議員梁耀忠（阿忠）話，呢排好多投訴話個藝術品「好肉酸」，已經約咗政府代表下周實地視察，想快啲拆走佢喎！
社交網站「荃灣葵青。左鄰右里」專頁前晚上載三張相，形容「又有一個地區小白象誕生」。從相中可見，路中心有一座由地磚堆砌嘅小山丘，仲掛個牌介紹係發展局去年舉辦「城市藝裳公共藝術比賽」嘅作品之一，名為「安全島」，政府仲專程將佢放番喺一個「真正嘅安全島」上面添！
街坊投訴好醜兼阻街
根據介紹，創作者係特意將地磚堆成「起伏的山形輪廓」，畀人坐低聚會同見面，仲希望可以「將無生氣的安全島變成一個活潑的景致」，令等待過馬路變成「愉快的經歷」。網民就笑「安全島」既似山墳，又似紀念碑，仲好鬼馬咁幫手改名話應該叫「食塵島」或「睇佢唔島」先貼切。
向阿忠查詢時，佢就立刻知道網民笑嘅「藝術品」喺邊，又好無奈話呢兩個星期接獲好多街坊投訴，覺得「座嘢」好醜兼阻街，遠睇好似放咗堆爛磚喺度咁。佢仲笑稱，「可能我唔識欣賞」，但街坊好想政府即時拆走。佢已經約咗發展局下周一去視察，當局應該會將展覽期由原來幾個月縮短番些少喎。咁即係叫發展局局長黃偉綸補鑊喇！
發展局回應查詢就話，呢個比賽嘅其中一個組別係以「動感之都」為主題，由評審團選出四個藝術作品，並由各藝術作品嘅設計團隊喺指定地點安裝同展出，每個作品嘅安裝費用上限為85萬元。該局話喺邀請設計團隊提交作品建議書時，已詳細列明需顧及交通安全，設計作品亦經由相關部門作專業評估，確保符合交通安全要求，跟住又話歡迎市民對展出嘅藝術創作提出意見，佢哋會細心參考，就展期作出適當調整。