中環出更：謝偉銓搞網上學堂 拍片吸引年輕人
香港地少人多，最近公屋排上樓已經要等起碼五年，全城陷入搵地建屋嘅討論。重返議會兩個月嘅建築界議員謝偉銓（Tony）都加入討論，日前喺社交媒體上載「Tony學堂」，同大家講吓有乜嘢地可以用。平時一貫正經嘅Tony喺片入面一人分演兩個角色，自問自答，表現得佻脫輕鬆，佢笑稱乜都要試吓，仲話想咁吸引多啲年輕人留意添！
一人分飾兩角冇咁悶
Tony係片入面介紹迪士尼第二期用地，由最初規劃，到協議安排，甚至政府修改估算入場人次等，清清楚楚咁講出來龍去脈。不過，佢就話呢塊地依家放喺度「曬太陽」，其實足夠起一個十八個洞嘅高爾夫球場，認為政府應該探討吓其他可能性喎。唔通佢想叫政府唔好搞高球場用地？佢即刻否認，只係潮流興講高球場，講幾多個洞大家好似易明解有幾大啫。
問到點解要一人分飾兩角，Tony話自己一個講晒會好悶，咁試吓唔同方法拍攝，希望將來可以吸引到人上嚟一齊傾。咁有無心水人物？佢就慨嘆難搵人，因為有啲人會擔心被抽水，目前節目無定時，只要有合適兼同業界有關嘅議題，都會拍片講吓喎。
卓妮