政情：肥老闆牛一 被祝快高長大
立法會金融服務界立法會議員張華峰（肥老闆）尋日六十六歲生日，佢嘅幾位黨友包括立法會主席梁君彥（Andrew）、工程界議員盧偉國（WK）、商界議員林健鋒，同代表鄉議局嘅議員劉業強「全男班」同佢慶祝，唔止送咗個有「六六大順、峰收年年」慶祝語嘅生日蛋糕畀肥老闆，仲齊齊唱咗首生日歌添！Andrew就祝肥老闆「快高長大」，噸位已不容小覷嘅肥老闆似乎都好受落，唔知肥老闆係咪覺得自己仲有繼續快高長大嘅空間呢？
被問到有乜生日願望時，肥老闆話自己好多夢想，好貪心嘅，生日願望除咗係快高長大、身體健康外，仲要日日股票上升，「388升到388」，即係港交所（388）嘅股價升到三百八十八港元咁話。
懶神秘冇講峰嫂送乜
食蛋糕時，WK就問肥老闆「峰嫂」係咪會同佢慶祝生日？點知肥老闆就話︰「峰嫂？定風騷呀？」又話夜晚喺屋企幾個細路仔同佢做生日，所以會同屋企人一齊過。至於「峰嫂」送乜嘢生日禮物畀佢，佢就懶神秘，冇透露，只係話︰「佢年年都送畀我o架啦！」