政情：重臨母校 陳浩濂憶小學雞點滴

屈身先坐得落膠櫈

Joseph重返當年就讀嘅番禺會所華仁小學，又去到讀三年級時嘅班房，坐番當日班號二號嘅座位上，木枱顯得細小，膠櫈嘅高度亦唔夠，佢要稍為彎曲身體先坐得落去。Joseph話就讀五年級後就做咗風紀，負責守住地下同樓上課室之間嘅樓梯，防止有同學喺小息期間走返班房，但代價係佢要犧牲小息時間，其他同學仔同朋友玩緊時，佢就要呆企梯口。

不過，佢話母校嘅教育學生做一個對社會有用嘅人，而非只識賺錢，所以當時覺得「做大哥哥嘅要照顧弟弟」，所以對風紀工作感到自豪，又話當年喺膊頭上嘅風紀章係布章，依家已改為貼紙。此外，佢升讀中學時既係辯論隊隊長，又係越野跑隊隊長，可謂文武雙全，但佢就自爆參與得太多課外活動，所以讀書成績唔係最叻拎十A嗰一堆喎，但係會考仍然有幾個A，都足以羨煞旁人啦！