政情：司機被指違泊 任葆琳認衰道歉
從政者受公眾監察，自然要律己以嚴。最近有網民上載片段，質疑南區區議員、前港姐任葆琳嘅座駕違泊，任葆琳尋晚就喺網上社交平台出文認衰，承認「做得不對，向大家道歉」，但之後又指係新請嘅司機「出於好意」先停車喺路邊。雖然佢講咗自己要負全責，仍始終予人將責任推卸畀司機之嫌。
網民：口講打擊 其身不正
任葆琳喺網上自爆，佢嘅座駕被網民發現泊喺無黃線嘅路邊，而片中亦見到佢上車，網民於是質疑任葆琳喺區內大大聲話打擊違泊，但自己就其身不正。任葆琳喺文首就先道歉，之後解釋話幾個月前請咗新司機，話自己多次提醒對方唔好違泊，佢相信今次事件係司機出於好意，以為「冇黃線、有司機在車便非違泊冇問題」而出事。
佢又指有法例列明「停車時間不可超過上落客所需的時間」，又指從政者要比一般人有更嚴格嘅水平，唔能夠「過到骨」就算，話已再次同司機溝通。佢之後仲話假如為呢件事受檢控，佢願意為告票罰款負責，又感謝市民指出問題。佢喺文末又乘機推銷政見，指自己正大力推動區內劃位，照顧上落貨需求。任葆琳今次認晒衰，未知投訴嘅網民又收唔收貨呢？