政情：阿忠理財不善街工斷水即乾塘

或與「逃兵」事件有關

阿忠講番上月底嘅會員大會，話當日只係提出問題，希望大家能夠一齊解決，又話勞工組誤解咗佢，強調無講過解僱，又無打算解散，更加唔係唔滿意佢哋。佢解釋，佢名下嘅辦事處有十八名員工，每年加薪約百分之五，「一人一萬（元）一個月都要使十八萬（元）喇」，所以每月營運支出都錄得近七萬元嘅虧損，過去依靠街工或籌款解決問題，但今年起有部分好友因為唔太接受街工嘅工作而停止捐款。講到有部分好友唔滿意街工嘅工作表現而閂水喉，係咪同阿忠做「逃兵」嘅事有關呢？話說喺今屆立法會開波，阿忠主動放棄主持選舉主席嘅會議，變相令建制派可掌控大局，畀梁君彥順利當選主席，惹嚟非建制派支持者狂轟同狠批佢做「逃兵」。

佢慨嘆，以往每年都籌到一百多萬元，舊年就只得約九十多萬元，減少約廿萬至三十萬元，形容情況係「突降」令佢有擔心。阿忠仲透露，今年初發現問題時，已將兩名喺天水圍工作嘅員工由全職轉為兼職，而辦事處同街工共有約六十多位員工，每月支出約一百七十多萬元，年花約二千多萬元，所以最起碼要有約二百萬至三百萬元做儲備，「但好明確依家冇」。佢仲話上個月初有職員反映欠約八十二萬元現金出糧，即刻要叫人找數，先有足夠現金出糧，所以佢更擔心日後冇足夠錢去承擔勞工組人工喎。

問到最壞打算會唔會同工黨合併，佢就話目前唔係討論呢個問題嘅時候。而根據佢最新向立法會遞交三月份嘅申報表，開支約為二十二多萬元，當中包括聘請十二名職員，而涉事嘅三名勞工組員工月薪，黎治甫每月獲一萬五千元、譚亮英為一萬九千元、王曉君為一萬七千元，三人月薪共花約五萬二千元。

照咁睇，街工已經面臨乾塘，依家又少區議員同只得阿忠一個立法會議員，點掘都難搵到水源支援喇！不過，呢個情況都唔係今日先出現，阿忠咁多年都唔識「睇餸食飯」，無錢仲搞咁多嘢，明顯就係理財不善，依家只係將問題曝光，都唔知可以點收科嘞！