中環出更：「睇肉團」唔夠腳 何俊賢拉埋陸頌雄
立法會食物安全及環境衞生事務委員會（委員會）計劃喺今年八月中搞巴西「睇肉團」，了解當地肉類處理同進出口檢疫情況，但議員反應就唔多熱烈，截至尋日只有七人報名，其中陸頌雄同何君堯並非委員。陸頌雄更踢爆「睇肉團」團長何俊賢（高佬賢）叫佢「剔住先（參加）」，自己最終未必會隨團出發。
陸笑言唔睇森巴女郎
目前報名「睇肉團」嘅議員，包括委員會主席兼團長高佬賢、副主席郭家麒，三名委員張宇人、黃碧雲同譚文豪，以及陸頌雄同何君堯兩名非委員。陸頌雄話要視乎暑假工作安排，先決定最終係咪參加，佢又話係高佬賢希望佢「剔住先」，指對方擔心團員太少，甚至唔夠三人而令成個行程被取消。陸頌雄從未去過巴西，但聽當地朋友話最危險嘅係治安，佢笑言即使去到當地，夜晚只會去咖啡店飲吓咖啡，唔會去睇森巴女郎，所以唔使擔心人身安全喎。
何君堯亦係未去過巴西，佢話今次除咗「睇肉」外，亦希望了解當地經濟、政治同法律等等，「巴西曾經係殖民地，行大陸法，有好多元素可以考察」，佢承認未就遠行做功課，希望立法會秘書處可安排打防疫針。至於高佬賢就承認名單未係最後定案，議員仍可以報名或取消，至於疫苗針等安排，佢認為議員可自行搞掂。
卓妮