中環出更：為仔女入心水學校 張范元芳：家長變孟母
古有孟母三遷，到咗今時今日就有更多現代版。香港孟子學院早前發起「香港推廣《中華母親節》聯席會議」（聯席會議），卓妮同香港西區婦女福利會永遠名譽會長張范元芳講起母親嘅辛勞，佢笑笑口話，佢嘅一對仔女已經結婚生子，睇見新抱為子女搵學校、返興趣班頻頻撲撲，仲辛苦過佢以前湊小朋友。佢仲形容，以前有孟母三遷，依家啲家長為咗子女就讀心水學校，一樣要搬嚟搬去添！
每年五月嘅第二個星期日係母親節，有冇諗過，中國人都可以有自己嘅母親節？聯席會議喺當晚就舉行成立晚會正式啟動以農曆四月二日孟子誕辰為中國母親節嘅推動工作，事關孟母係中國家喻戶曉嘅偉大母親，亦培養出偉大思想家、有「亞聖」之稱嘅孟子。包括張范元芳、副主席黃吳潔玲同古董文物藝術修復專家張鍾麗裳等人，都係應孟子學院副主席劉愛媚邀請出席。
李阮錦鑾獨生女剛出嫁
中華廠商聯合會永遠名譽會長李秀恒太太李阮錦鑾（Ivy）都係聯席會議榮譽主席，佢爆料話寶貝獨生女李楚洳四月啱啱出嫁。Ivy諗起個女自細就好黐身，成個樹熊咁黐實佢，直至拍拖先至開始甩身，依家搵到個好歸宿，佢就放心晒。張鍾麗裳就忙緊一場慈善音樂會，仲會獻唱抗日時期嘅一首《天倫歌》，都係歌頌偉大嘅父母之愛。
同場仲有孔教學院主席湯恩佳，佢都支持太太湯甄得萍做聯席會議榮譽主席。湯恩佳話依家香港人過嘅母親節源自美國，世界有八十多個國家有自己嘅母親節，中國有十三億人，梗係值得有自己嘅母親節。孟子學院創辦人黃祉穎就話，成立「中華母親節」喺內地已倡議近十年，香港加入倡議並非排斥西方母親節，而係希望藉此歌頌中國婦女嘅美德、宏揚孝道。
卓妮