政情：議辦「凶宅」冇人吼范國威焗啃「黃金屋」
香港土地問題嚴重，唔單止係市民排極都上唔到樓，有啲區議員一樣冇辦事處。最近房屋署就靜靜雞放番兩個議辦出嚟放租，分別係民建聯立法會前議員陳鑑林（橄欖）位於油塘邨嘅議辦，同埋民主黨（白鴿黨）立法會前議員劉慧卿（卿姐）位於隆亨邨嘅議辦。不過，兩個議辦都有「前科」，前者曾被爆格，後者曾被掟屎（黃金），可謂議辦中嘅「凶宅」，搞到冇乜議員夠膽入主，得啱啱做番立法會議員嘅范國威（Gary）搵無可搵，膽粗粗申請要卿姐個舊議辦。
按一般程序，房署會先向當區區議員「推銷」有「吉」嘅議辦可租，如果冇人承租，下一輪就到其他區議員，最後先排到立法會議員。而油塘邨嘅辦事處約有五十二平方米，但據知租金高達約九千元，而隆亨辦事處雖則只有三十六平方米，都要盛惠八千五百元。
有爆格前科議辦冇人要
橄欖舊議辦喺○六年曾經被爆格，偷咗千幾蚊，之後到佢卸任就冇再有其他人租過。九龍東五位立法會議員入面，橄欖黨友柯創盛（柯仔）本身已有三個辦事處，爆晒棚，冇辦法承接，其餘四名議員就只得白鴿黨胡志偉對呢個議辦有興趣，但係佢就話個辦事處格局好奇怪，岩岩巉巉又貴租。佢曾經同房署傾過想做「劏房」，只要其中一邊，可惜房署唔肯就作罷。白鴿黨以前喺油塘都有辦事處，係由立法會前議員李華明擁有，佢退落嚟就由佢嘅前助理、翠翔區議員謝淑珍接手，都好難怪胡志偉想搵位插旗嘅。
至於卿姐用咗廿五年嘅議辦，曾喺○三年就畀人惡意掟屎。新界東八位立法會議員中，公民黨楊岳橋聽到卿姐個舊議辦放租都呆一呆，反問「卿姐個議辦？」唔理解點解換屆兩年辦事處先再放租，所以佢都唔考慮。反而經補選重返議會嘅Gary呢排密密搵議辦，佢正打算同三位區議員搞聯合辦事處，目前一個位於將軍澳區嘅議辦已獲批可以運作，其他就仲搞緊。
Gary仲話好多地方都冇「吉」嘅議辦，佢先諗住做聯合辦，但又擔心因此租金增加，對區議員有壓力。但係當佢知隆亨有吉位即如獲至寶，返去諗咗幾日，就決定準備申請喇！開講都有話，最危險嘅地方先係最安全，所以係唔係「凶宅」都冇所謂喇，最緊要有地方服務街坊先係交到功課嘛！