中環出更：打造珠寶工藝基地 黃紹基：自己設計自己做
香港係設計之都，每年都有唔少珠寶設計師入行，但社會對初出茅廬嘅設計師支援明顯不足。一個由業界推動嘅珠寶工藝基地早前喺上環元創坊開幕，香港珠石玉器金銀首飾業商會理事長黃紹基（基哥）係幕後主要推手，佢話基地將開放畀本地同海外珠寶設計師短期進駐使用，仲有大師一對一提供技術支援，希望打造成為設計師嘅創意孵化基地。
基哥話新入行珠寶設計師面對唔少問題，例如點樣將讀書學到嘅理論同實際結合，或者有出色嘅設計如何搵到買家等等。呢個基地唔止提供場地畀設計師做平面設計，仲有打金器具供佢哋使用，實行「自己嘅設計自己做」。
吳景瀚話亞洲男士少穿金戴銀
現場有一位做咗三十幾年嘅大師級打金師傅梁志偉，佢現時喺順德嘅大師工作室工作。佢笑笑口話，其實打金同造假牙差唔多，記得有一次佢做假牙，牙醫要求佢去做工場配色，去到先知做假牙嘅工具同打金一樣，所以依家好多打金嘅科技，都係喺牙科同五金行業搬過嚟o架！
同場仲有香港寶石學協會前主席周家強、香港表廠商會會長林偉雄、香港金銀首飾工商總會會長簡健光同中華廠商聯合會會長吳宏斌個仔吳景瀚等人。簡健光都好有心，佢喺順德搞咗一個珠寶產業中心，希望為業界打造一個有生產、有批發、有銷售嘅產業中心。
吳景瀚最近轉攻鈦金屬男裝首飾，主要係外銷歐美。佢話亞洲男士扮靚觀念保守，好少穿金戴銀，卓妮見佢都冇戴，佢就笑稱因為男人只係綠葉，只需要身旁嘅女士閃亮就得喎。
卓妮