立法會之所以淪為「垃圾會」，皆因禮崩樂壞、無規無矩由來已久，之前「長毛」搶高官文件獲放生，向來愛搞事嘅政棍仲唔得寸進尺？民主黨立法會議員許智峯日前於一地兩檢條例草案委員會點人數期間，涉搶去一名保安局女行政主任（ＥＯ）嘅文件同埋手機，仲衝入男廁查看資料，其後歸還。事後佢仲未知衰，好得戚咁話自己「獲得」一部政府人員手機，發現當中有大量個人私隱，事態嚴重喎！
看官，小學雞成咁，何「智峯」之有哉？小學生都懂得「不問自取是為賊也」，何況是強搶！政務司司長張建宗稱，「涉事嘅女職員對事件感到震驚，情緒亦受到困擾」；保安局局長李家超亦表示，「今次事件是野蠻行為，保安局不會容忍」；建制派則指許智峯未經同意拿去他人財物的做法已經牽涉刑事。千夫所指，甩身冇咁易！
許智峯身為立法會議員，卻在立法會內破壞「法」，一個人失智成咁，應了「人蠢冇藥醫」呢句真諦，真係上帝都幫你唔到！佢在黨主席胡志偉及黨團召集人涂謹申陪同下，面如死灰，黨主席亦護短無從，惟有死死地氣道歉。呢個世界，始終都係有理才可走遍天下，無理則寸步難行！
血管之中，如果黏度過高，即成疾患。小學雞許智峯野蠻亂性，胡作非為，其血管中的黏度應已高至閉塞，若任由佢腦殘下去，遲早整鑊更杰嘅畀民主黨歎！
一個人德不當其位、能不當其職，再戀棧「尊貴議員」呢個高薪厚酬職位，到頭來都係自取其辱！今次呢單嘢，天眼已證許智峯搶女ＥＯ手機，若然警方搜集好證據，政府又「大和解」，律政司又唔告；或是上到法庭又好似「長毛」單嘢咁玩放生，咁以後搶劫都可以無罪啦！香港「法治」基礎本已不堪一擊，今更危在旦夕，林鄭上立法會答問大會時，手袋切記加鎖防盜！