政情：年輕人飲食西化 陳建年呻米生意難做
中國人鍾意食米飯，以為做米生意一定唔憂做？香港米行商會理事長陳建年（Kenneth）就話唔係，事關年輕人嘅飲食習慣西化咗，加上糖尿病患者同減肥人士唔敢食太多白飯，所以儘管香港人口增加，但係食米消耗量逐年下跌，生意愈嚟愈難做添！不過佢就無飯不歡，中午公司有供應午餐畀員工，佢若無應酬就會喺公司食，實行「自己嘅米自己食」。
欣賞台灣米農創新精神
台灣外貿協會駐港機構台北貿易中心主任巫英臣都係「嗅米氣」之人，佢話以前派駐荷蘭多年，全家人嘅主食都係白飯，但係當地食嘅係泰國米，同比較黏軟嘅台灣米唔同。Kenneth就笑笑口話中醫講血氣，米可以提供能量，所以有啲中醫好執着，知道病人唔食飯就唔同佢睇喎。
講起台灣米，Kenneth好欣賞當地米農嘅創新精神，好似近年興起食混合多種穀物嘅十穀米，正正係台灣「發明」嘅，最近大家又轉食標榜健康嘅藜麥，難怪白米消耗量係咁跌喇！