政情：植潔鈴包到冚去報名

東區區議會佳曉選區稍後進行補選，以填補早前因林翠蓮病逝而懸空嘅席位。立法會前議員鍾樹根助理、民建聯「小花」植潔鈴（Elaine）尋日報名參選。現場所見Elaine包到冚咁去報名，唔通驚走光？

Elaine掛民建聯同工聯會「雙牌頭」參選，工聯會會長吳秋北同幾乎大部分東區區議會建制派議員都有出席。睇真啲，所有印有Elaine頭像嘅展示板同橫額都包晒膠，好密實，仲反晒光添！事後問番，原來係Elaine團隊事前睇天氣預報，驚今日會落雨，所以將啲宣傳品包到實，費事淋濕晒整爛，果然夠晒慳家。

目前已報名參選嘅亦有早前退出新民黨、報稱獨立嘅陳真真。問到有冇擔心選情受影響，Elaine就話唔評論其他人，對自己選情有信心。

另外，民主派社福界選委李鳳琼尋日亦報名參選，下晝到小西灣邨搞造勢大會，有多名東區區議會泛民議員出席，同時立法會港島區議員區諾軒同社福界議員邵家臻亦有現身撐場。李鳳琼話住喺呢區三十年，希望街坊畀機會佢服務市民。佢又透露，已獲確認候選人資格。