政情：泛民搞到深水埗區會流會
近年因泛民拉布搞到立法會流會，而呢種風氣已經蔓延到區議會，最新嘅就發生喺深水埗區議會房屋事務委員會，委員會尋日傾緊調整居屋、綠置居售價嘅問題，希望可令居屋售價同市價脫鈎，但正準備就資助房屋嘅定價作動議表決時，一眾泛民議員先後離席導致流會，搞到深水埗區議會副主席陳偉明嬲到爆，仲喺Facebook直播，同其他議員包括甄啟榮、鄭泳舜同梁文廣等一齊鬧爆泛民。
表決突離席 事後稱誤會
陳偉明話個動議係民協提出，建制派雖有修訂，但大部分內容雙方都同意，雙方亦一直維持理性討論，唯獨有部分字眼要斟酌，唔明白點解泛民要搞到流會。陳偉明話會議法定人數係十三人，泛民陸續離席後一度得番十二人，當中有兩人係非建制，當時決定休會三十分鐘；但最後兩名非建制議員都走咗，所以最後有一名建制議員趕返嚟都唔夠人。
泛民被鬧爆搞到流會，民協譚國僑係其中一個離席嘅議員，佢話係一場誤會，又話今次唔係有組織導致流會，佢係因為約咗人先離開，相信其他泛民議員都係。不過佢就話問題不大，因為就算繼續開會民協都唔會反對，建制嘅修正動議都會通過，只係依家要遲少少先通過啫！