政情：謀婦委會擴權嫻姐諷張建宗大細超？
退下立法會議員火線嘅工聯會榮譽會長陳婉嫻（嫻姐），喺今年初被委任為婦女事務委員會（婦委會）主席。呢幾個月嚟，嫻姐都忙住處理《消除對婦女一切形式歧視公約》，又要落區，又要開諮詢會，但佢愈做愈覺得唔夠權力，仲暗諷由政務司司長張建宗揸莊嘅「青年發展委員會（青委會）都有十億（元）喇」，密謀婦委會要擴權、要加資源。
指資源不足 「青委會都有十億」
婦委會早幾日開公眾諮詢會，嫻姐話自從上月底開始做諮詢，不停落區聽意見，又說服地區去推動不同政策。佢又話上屆婦委會已同政府表達職權同資源有不足，咁就由上屆二千萬元撥款增加至今年嘅三千萬元，「不過你記住青年發展委員會係十億（元）」，笑問咁樣叫「增加」？所以嫻姐認為有必要同政府再傾。
嫻姐再講，現屆政府吼住五十四萬潛在婦女勞動力，不過覺得唔係推動做社區保母，「得十幾蚊一個鐘」，最低工資都冇，「互助？放第二度喇」，應該由婦委會資助，鼓勵團體做多啲地區照顧老人家等服務，畀啲婦女拎正式人工。
咁都不特止，嫻姐仲建議政府要更改賣地條款，所有賣地都要規定有託兒，兼且要檢討《規劃標準與準則》，列明幾多人口需要有託兒。佢直言，按政府現狀想釋放婦女勞動力，必須改變婦委會職能。
話時話，青委會工作嘅方向係要討論青年關注嘅政策議題，尤其青年「三業三政」，即學業、事業同置業，並鼓勵佢哋議政、論政同參政，依家青委會只係開咗一次會議，暫時都只係紙上談兵，唔知要討論幾耐先會開展一啲實質計劃，一大舊錢放喺度，唔知幾時先用得到。
再講，婦女工作千頭萬緒，資源少又真係巧婦難為無米炊嘅，依家嫻姐暗諷張建宗畀咁多錢青委會，政府有「大細超」之嫌，又話婦委會唔夠權力，睇怕嚟緊張建宗都要度吓橋，準備接招嘞！