中環出更：梁栢賢不再續約 同太太歎世界
醫院管理局行政總裁梁栢賢（PY）下年十一月約滿喇！據了解，佢決定光榮退休，同老婆大人一齊「歎世界」，唔再續約。扣除假期估計下年七月三十一日就「Last day」，佢尋日喺醫院管理局內務會議公布消息，係時候啟動遴選委員會搵「接班人」，而PY係有紀錄以嚟做得最耐嘅醫管局行政總裁，計埋下年做足九年。
做到下年七月尾
消息話，PY就快六十歲，近年已計劃未來花多啲時間共享家庭時光，打算退下火線。扣除假期嘅話，下年七月尾就會係最後一日返工，而喺今年五月會放個短假期，同太太、大女一齊去美國，參加細女嘅大學畢業典禮。然後會繼續處理埋一九至二○年度、二○至二一年度嘅發展計劃，以及下一個十年醫院發展大計嘅規劃書。處理完所有事務就同太太一齊退休，全副心機放喺家庭。
至於未來接班人係邊個？我哋八到至少有四個人選，其中包括幾個為人熟悉又資深嘅現任、前任聯網行政總監。
PY喺八五年加入政府擔任醫生，其後做過衞生署副署長、衞生防護中心總監，到○七年借調醫管局出任質素及安全總監，帶領新成立嘅質素及安全部，期間處理過汶川大地震、馬尼拉人質事件嘅災後醫療工作。直至一○年十一月獲委任為醫管局行政總裁，處理制度、醫生人手不足、促成新聯網劃界打破「山頭主義」，作風親民。
卓妮