中環出更：「太太在場唔偷食」 陳沛然屋企禁牛油
早前消費者委員會發現十幾款俗稱植物牛油嘅人造牛油含致癌物，同埋有機會損害腎功能同影響生殖系統嘅污染物，聽落好似好得人驚。幾位立法會議員就為牛油「伸冤」，劉國勳仲話鮮牛油要大啖食，而醫學界議員陳沛然（Pierre）都話食少少冇問題，跟住講開先知，原來Pierre太太好注重健康，喺屋企係禁絕牛油。咁太太唔在場時會唔會偷食？佢只係話︰「總之太太在場就唔食」。究竟有冇偷食？佢先知喇！
卓妮日前見到Pierre，佢話太太係家庭醫生，好注重健康，所以屋企唔會出現牛油，就算喺出面食麵包時搽牛油，都會被太太拎走，又話太太平時整海南雞飯，都會去雞皮，油飯轉白飯。講講吓仲大呻︰「我都係正常人」，都鍾意食呢啲嘢，其實食少少冇問題。
坐喺隔籬嘅資訊科技界議員莫乃光（Charles）買咗牛角酥，仲拎咗牛油加配，聽到Pierre大呻，就將牛角酥同牛油畀咗Pierre，仲話喺度食太太唔會知。Charles話雖然有指人造牛油致癌，但佢唔理得咁多，「咖啡夠有人話致癌，唔通唔飲咩！」但佢都認為消委會做相關研究係好事，市民知道後可自行選擇食唔食。
劉國勳愛鮮牛油 唔怕脂肪
劉國勳最鍾意食茶餐廳一大塊「撻」落餐包嗰種鮮牛油，一盒盒嘅人造牛油都無味嘅。唔怕高脂肪咩？佢笑言：「你放得舊牛油落口，你就預咗要做番啲運動去補償，有人話人造牛油脂肪低啲，只係自己呃自己」。佢又話飲嘢從來只落砂糖，唔會落代糖，因為佢食得「肥嘢、甜嘢」就係追求味道而非健康，呢個飲食價值觀相信已充分反映喺佢嘅身形上嘞！
另一議員麥美娟嘅「摯愛」統統係鮮牛油製品，好似鮮油多、西多士同牛油炒意粉咁，仲話牛油炒意粉好似失傳咗咁，只係傳統嘅西餐廳先食得到咁話。唔通佢唔怕肥？佢就話自己「有勞動、無運動」，食嘅全部嘢都唔係白食，所以無有怕。
卓妮