政情：辦公室變酒店 陳智遠重遊「回憶返晒嚟」
中環美利大廈以前係好多政府部門嘅辦公室，現時已活化咗做酒店，同時亦勾起唔少高官同公務員嘅集體回憶。好似食物及衞生局前政治助理陳智遠咁，喺Facebook上載咗「美利大廈揮手區」嘅相，仲大喊「真係乜回憶都返晒嚟呀！」
陳智遠於二○一二年中離開政府熱廚房後，轉而關注古蹟，又搞地區古蹟導賞團，或者因為咁對呢座有五十年歷史嘅政府建築物特別有感覺，當然亦唔可以撇除佢喺呢棟大樓返咗成三年工喇！
早前，陳智遠舊地重臨，去番當年食物及衞生局嘅辦公室，佢喺Fb留言話「當年每日喺十九樓電梯大堂出出入入，今時今日變成咁嘅樣，十九樓亦變咗二十二樓」，但佢依稀都記得當年自己坐嗰個位喺邊度。
舊同事叫搞導賞團
至於嗰個「美利大廈揮手區」，陳智遠話呢個係上車落車位，依家變咗可以搞活動或酒會嘅空間，仲大讚超正添！有網友更留言，記得「當年每朝遲到落的士都撞到（都同樣遲到嘅）老闆」，認真搞笑。唔少當年同佢共事嘅人都紛紛留言，談及當年喺美利大廈返工嘅點滴，仲叫佢搞番個導賞團添！唔知幾時成事呢？