政情：泛民建制鬥冧友法官任命小組恐流會

以往一有法官獲委任就會出現呢個小組委員會，過去報名嘅委員都只係得小貓三四隻，上年只係開咗一次會，同埋只得五個委員。今次個委員會就會喺今個星期五召開，依家三十二人當中，建制派就佔十八個，泛民主派就佔十四個。

好多報名議員非法律界

過去報名嘅委員都係律師、大律師，又或者有法律背景，而喺今次名單上，除咗有司法及法律事務委員會主席梁美芬、有大律師資格嘅公民黨楊岳橋、陳淑莊呢班法律界人士，就連金融界嘅陳振英、鄉議局嘅劉業強、教育界嘅葉建源，而一向關注土地、基建政策嘅自決派朱凱廸都榜上有名，關注法官任命安排添！

今次小組委員會係討論上個月特首委任兩個外籍女法官，出任終審法院其他普通法適用地區嘅非常任法官。有建制中人就透露，曾經聽過市民對呢次任命有意見，加上見到一向支持性傾向議題嘅泛民議員都有加入，認為會對佢地推動議題會「如虎添翼」，所以先發動「冧友」，同埋佢哋都屬意由梁美芬做主席添！不過有泛民就擔心法官任命會政治化，再加上唔少議員都關心法官任命，所以先會有咁多人加入。

咪以為人多好辦事，其實人多都可以好累事。由於一般事務委員會、法案委員會嘅法定人數係委員嘅三分之一，正如早前兩派「冧友」加入《廣深港高鐵（一地兩檢）條例草案委員會》，搞到委員會人數破天荒有六十四人，法定人數亦都提高至廿幾人，最終亦發生流會情況。依次小組委員會成三十幾人，法定人數就要有十個，雖然一般都唔會開好多次會，但正所謂「唔怕一萬、只怕萬一」，分分鐘班議員唔上心或有乜甩漏，隨時又搞到流會，屆時咪又係浪費時間同公帑。