中環出更：梁廣灝教小朋友「唔好理想高於能力」
「養兒一百歲，長憂九十九」，究竟要點樣教育小朋友？專業及資深行政人員協會（專資會）尋日舉行傳媒午餐聚會，新一屆理事會成員唔少都已經係父母，甚至祖父母，講起仔女經真係講唔停。創會會長容永祺（Samuel）話教小朋友最重要係順住佢哋想做嘅嘢而行，至於副會長梁廣灝（Edmund）就話有四個孫，佢唔會做怪獸家長，亦唔需要啲孫做最叻嗰個，但最緊要教佢哋要滿足現狀。
Edmund話好錫啲孫，啲孫話要食雪糕就買雪糕畀佢哋，話要食糖就買糖，仲試過同孫女夾埋瞞住個仔添，個仔問孫女有冇睇平板電腦，孫女冇出聲，佢就代孫女講冇乜點睇。睇嚟感情真係好好！講起教小朋友，佢話教小朋友有少少理想係好，但就唔好理想高於能力，其實冇可能一畢業幾年就買樓，即使佢當年喺行內已有相當成就，未夠四十歲都唔敢買樓。
容永祺支持大仔意願
Samuel就話教小朋友最重要順住佢哋想做嘅事就畀佢哋做，就好似佢大仔原本係讀法律，但就覺得唔適合從事法律行業，希望去做保險，佢都相當支持阿仔。
專資會啱啱去過內地考察，副會長羅志聰都有一齊去睇無人駕駛，佢話會長李鏡波有試坐，事後仲分享煞車技術未夠成熟添！李鏡波就講起佢哋去咗參觀南沙嘅固體廢物處理設施，見到當地可以將廢料變成磚，覺得香港就好難做得到啦，因為地區一定會反對，即使喺香港一啲島嶼起呢啲設施，都會被人質疑點解唔用嗰塊地嚟起樓，佢建議可以考慮將香港嘅固體廢物以船運到內地一啲地方處理喎。
卓妮