政情：今日你上鏡：百元草包 陳李妮襯出高貴
博愛醫院永遠顧問陳李妮（Lily）不時都會返鄉下海南開會，呢兩日海南舉行建省三十周年大型活動，Lily同一班海南籍名人梗係要返去開心吓，當中包括同樣係海南人嘅百仁基金前主席李文俊，同埋喺海南投資高爾夫球場及度假村近三百億元、當海南係第二故鄉嘅香港海口聯誼會創會會長朱鼎健。
三位年輕人好啱傾，開完大會都不忘留影，見Lily拎住一個好有海島風情嘅包包，唔講仲以為係海南特產。Lily就話，個包包係用藤編織而成，只係個草包嚟，係佢喺西班牙旅行時買，只需十歐元，即一百港元都唔使，不過佢就勁鍾意。所以話，扮靚唔一定要貴嘢，着出高貴而不貴先至係高手。