政情：鄺俊宇「跌大」：公園要有鞦韆玩
打鞦韆、瀡滑梯和氹氹轉，呢啲耳熟能詳嘅公園康樂設施，已漸漸消失變成集體回憶。立法會議員鄺俊宇（Roy）就覺得公共屋邨要增設鞦韆，仲要係長方形木板可以企上去嗰款，直言「細路仔唔跌點識大」。阿Roy正正係喺公屋公園「跌大」，小時候常獨自跑到公園玩，鞦韆係最愛，佢企喺鞦韆時手一鬆，結果喺空中「飛翔」咗兩秒後心口落地，手腳擦損，「好彩無破相咋！」
雖然阿Roy自此有陰影唔敢再企喺鞦韆板上玩，但佢認為小朋友唔跌唔識大，仲話好懷念兩層高嘅鐵製滑梯，同埋可以十幾個人玩嘅氹氹轉，皆因現代嘅膠滑梯同小型氹氹轉一啲都唔過癮，試過帶親戚啲小朋友去公園玩，結果唔夠幾分鐘就嫌悶，要求返屋企玩平板電腦。
盼小朋友跳出螢幕
阿Roy又話，以前啲玩具都鼓勵小朋友面對面交流，例如會約出嚟一齊玩四驅車，從中互相認識和學懂待人接物，但新一代小朋友愛玩電子遊戲，只顧望住螢幕，所以希望政府重新興建一啲好玩、具挑戰性嘅康樂設施，吸引愛宅在家嘅小朋友。