政情：林健鋒忠告巴西「睇肉團」咪戴朱義盛
立法會食物安全及環境衞生事務委員會計劃喺今年八月搞巴西「睇肉團」，山長水遠去了解當地肉類處理及進出口檢疫情況等事宜，隨團議員未出發先興奮。不過，有唔隨團嘅議員就好心忠告，好似何啟明就提醒長者議員前往巴西前注射疫苗要留意風險。而身兼行政會議成員嘅商界議員林健鋒（Jeffrey）亦都專家上身，忠告參加巴西「睇肉團」嘅議員千祈唔好戴「朱義盛」（仿金手飾），否則後果自負，究竟此話何解呢？
指女遊客失財兼被打
其實Jeffrey並非食物安全及環境衞生事務委員會委員，亦都冇打算參加巴西「睇肉團」，不過佢就對巴西當地情況好熟悉。提到當地嘅治安問題，Jeffrey就話聽過一個故事，講一位女遊客喺當地沙灘被人搶走身上首飾，唔好以為被人搶劫已經夠慘，之後發生更慘嘅事。當事主返到酒店樓下，有個陌生人問佢係咪被人打劫，嗰位女士就答「係」，點知即刻被嗰位陌生男子打咗一拳，仲警告佢以後唔好戴「朱義盛」 出街。
Jeffrey就忠告參加「睇肉團」嘅議員，最好唔好戴到成身貴重嘢咁，以免引起賊人注意，如果係要戴嘅話，都唔好戴假嘢喎。講到「睇肉」，Jeffrey經常都去巴西公幹，所以同當地好多肉類供應商都好熟，佢話巴西有過千間肉類供應商，但唔係間間都供港出售嘅，如果漫無目的咁睇，只會費時失事。況且巴西咁大，又有咁多間廠，分分鐘一日只夠時間睇到一兩間。Jeffrey咁講，唔知佢有冇向委員會提供意見呢？
講講下「睇肉」，Jeffrey跟住又達人上身，話除咗靚肉同足球，巴西種樹同造紙都好專業，又話好多人都會選擇去里約熱內盧、聖保羅旅遊，而佢就會推介巴西第一個首都薩爾瓦多，覺得當地係濱海城市，有巴西第一座大教堂同最老嘅醫學院，而且仲保留住好多文藝復興式嘅建築，仲直言嗰度買樓抵，話遷都之後好多人都搬走晒，有好多空置單位，只要肯買就得喎。睇嚟巴西「睇肉團」要搵佢帶隊先至啱數！
張宇人聽話查問疫苗
今年六十八歲嘅飲食界議員張宇人已經決定參加「睇肉團」，對於何啟明早前嘅打疫苗忠告，佢就話唔怕注射疫苗會有副作用，又話好多嘢都會敏感，唔一定打針先會，只要注意同有準備就得喇，而佢都會問衞生署人員意見，睇吓自己係咪適合注射疫苗。