港產官僚出晒名大隻講，任何政策都係講就天下無敵，做就無能為力，唔使講咩，淨係保育政策已經夠晒天殘地缺，港府口講保育，但又全無配套，賠償方案滿足唔到土地擁有者咯喎，咪搞到接二連三出現「先破壞，後發展」嘅例子囉。
嗱，就講有「香港人後花園」之稱嘅南生圍濕地吖，過去一個月內多次發生火警，相當有可疑，頭兩宗仲要係接連兩日內發生，若果當局真係重視保育南生圍生態環境，就好應該認真看待呢兩單「怪火」，點會一而再、再而三咁任由火警發生？可想而知，呢個政府保育只係葉公好龍，有姿勢冇實際。
仲有喎，環境局局長黃錦星被問到係咪應該用公帑收回南生圍嗰陣，即刻鬼拍後尾枕，反問係咪一定要保育南生圍，擺明冇心冇肺喇。有保育團體就批評政府十幾年來保育進度緩慢，喺十二個需要優先加強保育嘅地點，只係做咗五個，直指港府繼續hea做，即使南生圍縱火事件最終破案，始終都係治標唔治本，火繼續燒嘅咋。
即係咁，南生圍雖然係雀鳥天堂、當年小灣鱷貝貝嘅棲息地，亦係唔少香港人假日郊遊、婚照取景熱門地，但由於土地屬私人擁有，唔少仲已被收購，平衡唔到保育同發展之間嘅矛盾，即係永遠冇可能有效保育。本來呢，政府出錢買番南生圍裏面大約九十公頃嘅四個私人地段就一天光晒，但一講到錢，呢個政府就會諗計縮沙，何東花園保育失敗咪就係典型例子囉。又好似景賢里、青山紅樓等等，都係被業主拆到蓉蓉爛爛，社會嘩然，港府先至不情不願保育，醫番都嘥藥費喇。
睇到喇，呢個政府就係一方面搞保育呃Like，另一方面又想食免費午餐，佢自己都成日將「地從何來」、「寸土必爭」掛喺口邊喇，竟然以為將私人土地劃成保育地帶，土地擁有人就會心甘情願嘔塊地出嚟，係咪想創個心呀？幾年前大嶼山大蠔班村民就出動挖泥機、鋤頭將紅樹林連根拔起，話畀政府知咪使旨意，雖然破壞環境係唔啱，但何嘗唔係官逼民反吖？香港話晒係法治之區，私人財產受法律保障，港府妄想靠把口保育，補償方案就提都唔提，即係霸王硬上弓，變相侵吞私人產權、激起社會分化、製造民怨炸彈啫。
都係嗰句喇，港府善財難捨，冤枉甘心，要跌舊大錢出嚟搞保育喎，梗係口爽荷包立啦，到頭來一事無成不特止，保育地唔係消失於推土機下，就係被人一把火燒光，好山好水消失殆盡，香港人真係多得呢個政府唔少！