政情：柯仔換新眼鏡 官員認唔出
立法會換屆已將近年半，而新一屆政府官員上場亦已有九個月，但竟然有官員仲未認得啲新丁議員，而呢個新丁議員就係九龍東議員柯創盛（柯仔）。立法會尋日就高鐵一地兩檢召開公聽會，其中一節有十六人發言，而柯仔就坐喺會議室內最後一排，並與公眾人士排排坐，結果負責嘅官員就將柯仔當成公眾人士，見柯仔未發言就問係咪仲有一名公眾人士未發言。
柯笑指對方未上電
官員唔認得柯仔，場內隨即議論紛紛，非常尷尬，有議員就幫口，話柯仔換咗新眼鏡。官員最後都連聲道歉，辯稱柯仔坐得較遠而睇唔清楚，仲重申要確保冇遺漏任何人喎，最終就勞煩委員會主席葉劉淑儀以「柯議員今日（尋日）特別靚仔」去打圓場。作為官員都唔認得議員，都唔知仲講咩改善行政立法關係。
柯仔其後就話因近視加深而換咗新眼鏡，佢就估計係因為換咗眼鏡同角度問題，先至令官員認唔出佢，仲講笑話有關官員未上電，所以先吽吓吽吓喎！