中環出更：方國珊「收兵」 講明冇糧出
西貢區議員方國珊（哪吒）多次參加立法會選舉都失敗而回，不過得票就節節上升。哪吒近日喺社交網站公開「招兵」，唔通咁快已經為後年立法會換屆選舉招賢納士做準備？睇真啲佢開出嘅「招兵」條件，既要有大學學位或同等學歷，仲要有至少兩年政策研究及公共事務等工作經驗，專業人士更加係優先考慮，但重點竟然係冇糧出。
叫後生仔唔好怕蝕底
哪吒就解釋話，補選後有好多年輕人詢問可否加入佢嘅團隊，佢都想搵啲高質素、講理念、重民生嘅後生仔開吓會，就唔同政策畀意見。佢仲講笑自己經歷多次選舉，都攞晒棺材本出嚟啦，叫後生仔唔好怕蝕底，「諗錢就唔好從政」喎。
明年即將舉行區議會選舉，被問到今次「招兵」係咪想擴闊「專業動力」版圖，哪吒就話，嚟緊有好多選舉，佢都好多區議會選舉經驗，但自己唔想做「飛機場」，即係幫人助跑，但如果有合適嘅話，不論係做政策研究定係喺前線，都會有好大空間咁話。哪吒依家玩講心唔講金，唔知早前佢嘅動人玉照流出，會唔會有助佢「收兵」呢？
卓妮