中環出更：鍾愛家鄉海南雞 張文嘉自製醬汁
仁濟醫院董事局早前舉行換屆就職典禮，做咗八年總理嘅中華出入口商會會長張學修嘅女兒張文嘉升呢做副主席。講起家鄉海南，張文嘉笑言最鍾意當地馳名嘅文昌雞，即海南雞。雖然佢好少返海南，但仍有新鮮空運到港嘅文昌雞食，點解？因為佢爸爸經常返海南，臨上機返港前都會買好多即劏即煮嘅文昌雞返港囉，認真幸福。
張文嘉話，雖然香港都買到文昌雞，但係味道唔同，就算醬汁亦都唔同。佢眉飛色舞咁話，正宗海南雞嘅醬汁係用剁碎嘅芫荽、葱加埋白醋做成，而唔係用薑蓉、蒜蓉，佢都經常自己炮製添。
嚴紀雯接力做總理
同場仲有卸任主席嚴徐玉珊、丈夫嚴玉麟及女兒嚴紀雯（Carmen）。嚴太笑言過去一年好豐盛，一日趕幾場，形容呢世人都未試過咁忙。佢「畢業」離開董事局，但Carmen就接力加入仁濟做總理。嚴太笑笑口話，外面有好多慈善機構搵Carmen，不過Carmen話自己喺仁濟大，所以揀咗仁濟。細心計吓條數，原來嚴太同做過仁濟主席嘅嚴玉麟加埋共有廿年時間喺仁濟，難怪個女話喺仁濟大喇！
接任主席嘅馮卓能（Clement）成晚忙到冇時停，佢太太Winnie同埋三名年幼子女都有到場支持。Winnie話，預咗未來一年老公忙到返唔到屋企，如果三百六十五日之中有五日時間畀屋企人，已經好開心。Clement聽完係咁笑，表情好冧。都話成功男人嘅背後，總有個默默支持佢嘅女人喇！
卓妮