中環出更：「旅遊控」教路 私人機包團最抵玩
香港人鍾意去旅行，所以旅行社生意長做長有。仁濟醫院總理鮑誠業（Sammy）就係因為鍾意旅行，最近索性入股一間旅行社，實行肥水不流外人田。Sammy玩得好精叻，教路話可以搵十幾個人包架私人飛機去玩，使費仲平過搭頭等艙喎！
Sammy笑笑口話，包私人飛機聽落好似好奢華，其實佢計過條數，認真唔貴。以飛日本為例，一般頭等艙票價要七、八萬元，包架私人飛機嘅使費加加埋埋大約廿幾萬元，不過最多可坐十六人，攤分之後每人唔使兩萬元，形容係除笨有精。所以想玩得豪啲、舒適啲，不如試吓包團坐私人飛機。
仁濟新任主席馮卓能聽完都覺得好吸引，不過佢預咗今年會忙到氹氹轉，冇得去旅行。佢話仁濟每年都會有官式外訪，包括去日本，但係外訪團通常都超過廿人，包私人飛機就冇得諗喇。
成日暫託貓 鄭承隆索性開酒店
呢一日係Sammy嘅旅行社舉行開幕典禮，好多仁濟人都去撐場，包括前主席鄭承隆。佢最近開咗一間豪華貓酒店，原因唔係鍾意貓，而係好多養貓嘅朋友出埠時會將貓咪交畀佢睇住，所以索性開間酒店。佢笑笑口話呢間貓酒店大房每晚盛惠五百元，仲貴過人住嘅酒店，不過間房就大到人都瞓到喎。
仁濟前主席梁昌明嘅媽媽梁劉靜慈都喺度，佢預告今年十一月將繼續揸旗籌辦「仁濟愛心慈善粵劇粵曲晚會」，笑稱呢個活動已經做咗第十年，籌款成績愈嚟愈好，好開心獲仁濟董事局列為恒常籌款活動，所以幾辛苦都值得咁話。
卓妮