古語有云：「天之道，損有餘而補不足；人之道，損不足而奉有餘。」睇番香港嘅社會福利政策就真係逆天而行，拒絕對窮人雪中送炭，一味對富人錦上添花，唔怪得港府扶貧失敗，愈扶愈貧，由以前七個港人一個窮，變成依家五個港人一個窮喇！
尋日有機構發表調查報告，分析咗本港六十六間接受社署整筆過撥款資助社福機構嘅管理層薪酬結構，赫然發現當中有十五間嘅高層年薪比社署同級職員高，數額最誇張嘅更加相差高達三十八萬元；有六間機構過去兩年每年高層加人工平均多過一成，加幅仲多過公務員。係人都知，本港高官嘅人工世界一流，而社福機構管理層嘅人工仲高過高官，咁咪即係世界超一流？呢啲咁嘅肥缺，打燈籠都搵唔到第二度嘞！
咁都未止呀，調查又發現，有三十二間機構嘅高層除咗獲發基本薪酬，仲攞埋一筆過嘅現金津貼，呢筆款項總數都成七百八十八萬元。難為港府自吹過去五年用喺社福嘅撥款大幅增加咗五成，點不知啲資源唔係用喺有需要嘅人身上，反而落晒管理層口袋，咁樣肥上瘦下法，撥多多錢都幫唔到啲窮人，唔怪得畀人話係殘民自肥喇。
喂，社福機構喎，唔係幫助窮人，反而幫助富人，劫貧濟富，簡直離晒大譜。最離譜係，社署批款一筆過，但就根本無監無管，任得啲社福機構管理層自把自為，加薪又得，津貼又得，大花筒又得，混帳都仲得，一句講晒，絕對權力導致絕對腐敗，呢啲絕對唔係專制政權嘅專利。
大家有眼見，好多社福機構盤數都係唔清唔楚，報嘅使費高到嚇死人，最誇張嘅係有機構雜項都使咗接近三千萬元，係人都睇得出極唔尋常啦，偏偏社署就闊佬懶理，仲以「機構有理財彈性」嚟做藉口拒絕負起監管責任。所以話啫，上樑不正下樑歪，社福機構管理烏煙瘴氣，七國咁亂，公帑使用存在大量灰色地帶，上面吸吸埋埋，落得到窮人身上嘅只係殘羹冷炙。
講到社署管理混帳，點止社福機構亂龍呀，好多慈善機構都係掛「非牟利」羊頭，賣「自肥」狗肉，啲高管想方設法為自己加薪加津貼，將慈善做成一樁無本生利嘅事業。善長仁翁慷慨解囊，點知幫唔到有需要嘅人，反而就被人上下其手，吹脹！
呢個政府就係咁賤格，對小市民就斤斤計較，就講今年財政預算案吖，選擇性派四千元咁大把，仲要人申報呢樣嗰樣，但對住呢啲社福機構亂象就隻眼開隻眼閉，邊度係關心窮人o架，嫌貧愛富就真，結果就搞到貧富懸殊惡化，民怨沸騰嘞！