政情：八網難逃：颱風愛倫勁過天鴿 岑智明向前台長取經
舊年八月威力十足嘅颱風「天鴿」，相信好多人仲記得，事關除咗香港要掛十號風球之外，對澳門、珠海更加係造成嚴重破壞，唔知今年會唔會有另一個「天鴿」出現？不過，每次有颱風出現，最重要係天文台處理得好，準確預報先可以有效降低傷亡。所以天文台台長岑智明都唔敢怠慢，最近仲飛咗去英國探望已退休嘅天文台前台長John Peacock（費慤），互相交流下心得咁話！
兩人共包辦6個10號波
岑智明尋日喺Facebook上載咗幾張同費慤嘅合照，仲留言話兩人合共包辦咗六個十號風球，當中岑智明處理嘅「天鴿」都未算最強勁，一九八三年由費慤處理嘅強烈颱風「愛倫」先係首屈一指，除咗風速比「天鴿」更加快之外，仲喺香港掛咗八個鐘十號風球，比「天鴿」嘅五個鐘仲要多！喺會面後，岑智明仲喺Fb讚費慤身體壯健、頭腦清晰，睇嚟今次會面岑智明都應該獲益良多喇！