政情：黃大仙區會外訪 唔見立會議員
立法會議員間唔中都會同各區區議員會面，傾吓各區嘅社會議題、民生事項咁，不過黃大仙區議會尋日就取消咗原定喺下個月二十五日嘅會面，原因係新編定咗一次職務訪問而未能出席，唔知佢哋要去邊度呢？仲重要過同立法會議員會面？
黃大仙區議會副主席黎榮浩話係因為好可能要去重慶、四川考察，而呢個外訪都已經計劃咗一段日子，最後同立法會議員會面撞期都冇辦法。不過黎榮浩補充，雖然會面改期，但唔會有項目因此而延誤嘅。
計劃去重慶 會面改期
翻查資料，黃大仙區議員嘅外訪工作小組仲未通過外訪重慶呢個項目，連去重慶、上海、北京定係天津都未定，咁快就取消咗個會面？黎榮浩話其實都只係程序問題，而好大機會係去重慶，下次開會就會通過o架喇！