相信大家都記得喺上屆立法會會期尾，時任醫學界議員嘅「怪醫」梁家騮瘋狂拉布，結果拖垮咗改革醫委會嘅條例草案，畀外界鬧爆佢醫醫相衞。到咗尋日再經修訂嘅草案終獲立法會三讀通過。現屆嘅醫學界議員陳沛然喺發言時仲為怪醫平反，指怪醫冒住被指摘嘅壓力，拉布阻止草案通過，先有機會讓政府作出改善。唔知陳沛然咁講，怪醫係咪覺得冇咁傷呢？
