政情:邱騰華訪京 避答制裁港船?

美國政府早前宣布向北韓實施歷來最大規模嘅制裁行動,以切斷北韓核計劃財政來源,美國同北韓問題因乜解究連香港嘅立法會議員都關心,仲要喺立法會提出質詢呢?議員鄭松泰尋日喺立法會大會提出口頭質詢,原來係有被指協助北韓逃避國際禁運嘅香港船務公司被列入制裁名單,佢要追問港府點處理。咁啱商務及經濟發展局局長邱騰華去咗北京,未有出席大會回應。鄭松泰就問,邱騰華係咪「去咗北京同金正恩會面同交涉」喎。

鄭松泰斥回應輕描淡寫

由於邱騰華唔喺香港,尋日由商經局副局長陳百里代佢去立法會回應議員提問。陳百里就批評美方嘅措施係單方面同帶有歧視,又話當局已同美國駐香港嘅領事會面,要求美方對香港免除限制,亦已同五大商會會面,佢哋都支持政府行動。

但鄭松泰唔滿意當局嘅回應,話當局講到「輕描淡寫」咁,仲問邱騰華係咪「去咗北京同金正恩會面」,傾呢個北韓、中美貿易、朝鮮問題添!而陳百里就否認佢係輕描淡寫,話當局係嚴肅處理緊件事咁話。

第一手消息請下載on.cc東網iPhone/iPad/Android/Windows Phone Apps