政情：公民講場：派糖不均激民憤 陳茂波補極都漏

財政司司長陳茂波上月公布現屆政府首份財政預算案，坐擁豐厚盈餘都企硬唔派錢，即使派糖都派得唔勻，惹嚟連串批評，包括派發一萬張海洋公園門券被質疑，而關愛基金為預算案「補漏拾遺」又被批評為「補鑊基金」，有違基金嘅原意。至於預算案建議為明年中學文憑試（DSE）考生代繳考試費，又引起全民報考嘅恐慌，教育局局長楊潤雄尋日終於出嚟補鑊，表明會收窄到只為學校考生代繳費用。一份預算案都搞到甩甩漏漏，補鑊補極都唔完，究竟陳茂波係咪力有不逮呢？