- on.cc 東網主頁
- 3月22日 (六)
近年電子競技大熱，仲已經成為咗全球嘅新興產業添，唔少人都開始打機搵真銀。新一份財政預算案亦話撥款推廣電子競技，作為創新及科技局政治助理嘅張曼莉（Lilian）就自爆，加入政府之後就學番打機。講起女性打機，好自然就會諗起用真名打機嘅立法會議員容海恩，但Lilian就話自己打機程度麻麻，所以唔敢向容海恩「挑機」咁話。
Lilian話自己比較男仔頭，所以以前讀書年代都有打過吓機，但就打得麻麻哋，同埋多數只係用手機玩。無論以前定依家，坊間一向都有唔少打機攻略，甚至會有網民寫好晒啲攻略，等一眾新手可以偷吓師，但Lilian就冇上網睇攻略，反而有乜唔識都會問男朋友，仲會一齊組隊打添！
唔通Lilian嘅男朋友打機好叻？佢解畫，話男朋友打機其實都係一般，不過男朋友就好有耐性，會不停幫佢解答疑難。早排創科局局長楊偉雄自爆反應遲鈍，所以打機「兩秒玩完」，仲話會拖埋隊友落水添！同樣係創科局，唔知Lilian會唔會考慮吓搵埋局長一齊訓練，咁遲啲出席活動露兩手之餘，楊偉雄又可以乘機練吓反應，唔使再兩秒玩完啦！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
