唔少人都聽過「郵差叔叔送信純熟迅速送出」呢句急口令，可惜現實中嘅香港郵政啱啱相反，佢哋唔只服務質素差，員工最叻集體蛇王呃加班津貼，就連需要簽收嘅掛號信都可以派到無晒影，失信於民多過食飯，用「郵差蛇王送信甩轆加班呃錢」嚟形容就差唔多！
雖然香港郵政被審計報告多次點名批評管理不善、浪費公帑，但即使孭住「審計署長寵兒」呢個諢名，佢哋依然我行我素，胡混度日，愈做愈差，近日有市民苦候多時仍未收到保險公司以掛號信寄出嘅支票，查詢後至發現信件仍然留喺郵局，懷疑有郵差送信摸門釘後冇按程序發出「領取掛號郵件通知卡」，於是向香港郵政投訴，但等咗近兩個禮拜都冇回覆。
睇到啦，香港郵政就係咁Hea o架喇，邊度係真心真意服務市民(o架)！雖然家陣已經係互聯網時代，冇乜人寄信，要處理嘅郵件數量不斷萎縮，但香港郵政維持人手不變嘅同時，每年超時津貼竟然不減反加，話冇蠱惑連三歲細路都唔信！奇就奇在從來冇見有人為此被問責，反而耐唔耐就畀正義傳媒踢爆郵差蛇王踢毽、將郵車泊埋一邊眠一眠，又或者開工玩手機嘅醜聞，沒有最醜，只有更醜，家陣居然發展到連基本派信服務都做唔好，仲對市民投訴闊佬懶理，果然係鐵飯碗唔憂做！
最離譜嘅係，就算審計署不斷批評香港郵政喺管理郵局、郵件處理、郵政車輛、中央郵件中心運作方面表現差劣，但佢哋知錯不改，面皮超厚，難怪締造出廿年來八年虧損、十四年達唔到目標回報率嘅懾人紀錄。佢哋仲試過一毫子郵票賣晒，「焗」市民買貴郵票寄信，咁嘅公共服務你要埋我份嘞！
咁都未夠衰，香港郵政長期容許員工「瘋狂加班」呢一筆最離譜，審計署報告炮轟有郵政員工一年加班一千四百小時，即係相當於每日四小時，納稅人要為呢筆過億元嘅補水費用埋單，仲有冇再荒謬啲吖！講真，如果真係有咁多人做嘢，九龍灣中央郵件中心就唔會變成「老鼠樂園」啦！其實喺郵差圈子早已戲稱呢種慣性加班做「捉鴨」，乃真正嘅肥缺，斬到納稅人一頸血！呢啲一邊玩忽職守，一邊加班呃錢嘅員工，換轉私人機構早就炒咗九世，偏偏喺香港郵政就可以安心尸位素餐，唔係官官相護係乜嘢呀？難為特衰政府口口聲聲「審慎理財」，簡直笑大人個口！
話就話香港郵政自負盈虧，講到尾特衰政府咪又係搵納稅人笨！講到失信於民，特衰政府同香港郵政都係一擔擔嘅咋！