政情：李鋈麟三仔女愛玩高風險活動
香港有唔少「怪獸」家長對仔女保護到無微不至，仔女要參加高危活動都no way。不過，東華三院主席李鋈麟就採取自由放任政策，大仔就鍾情於方程式賽車，二仔就玩潛水，細女就熱愛騎術，樣樣都屬於高風險活動。唔通李鋈麟真係咁放心冇有怕？佢就答「生死有命，富貴由天」，真係冇佢符。
李鋈麟話以前想揸電單車，所以去學車，但係因為學車時炒咗車，媽媽就唔准佢繼續學電單車喇！可能因為好明白呢種心情，所以依家仔女想學啲乜、玩啲乜佢都唔會阻止。佢仲話，阿女之前練習騎術時跌咗落地，搞到頭盔都爛埋，右手又瘀傷，但佢都允許阿女繼續練習，結果阿女就喺受傷幾日後嘅比賽中奪冠。
大仔想玩一級方程式
佢大仔依家仲喺國際學校就讀，被問到係唔係想參加一級方程式比賽，佢就話之前都喺一啲小型賽車比賽中攞過好多獎，亦都玩過四級方程式賽車，估計一級方程式賽車會好難，但大仔都希望有機會玩一級方程式賽車喎。