政情：接替王桂壎 譚允芝任通訊局主席
上任不足一年嘅通訊事務管理局前主席王桂壎，早前因漏報持有中國移動香港嘅股票利益而辭職，成為通訊局歷來最「短命」主席。政府尋日公布委任大律師公會前主席譚允芝出任通訊局主席，即日生效，任期至明年三月底，即王桂壎原來任期嘅屆滿日。
譚允芝為私人執業資深大律師及國際仲裁員，現為香港旅遊發展局、西九文化區管理局及廉政公署貪污問題諮詢委員會嘅成員，並曾出任上訴審裁團（建築物）主席及電訊（競爭條文）上訴委員會成員。
王漏報股票利益請辭
王桂壎去年四月一日獲委任為通訊局主席，原定任期兩年，但係佢上個月中突然宣布已向特首請辭，因為佢一直冇察覺持有一批中移動嘅股票，直至最近沽售整批股票後先知漏報利益。佢認為規矩終歸係規矩，決定立即辭去主席，以維持公眾對通訊局嘅信任。