政情：建制祝捷自拍 娥姐天然呆「攝」入
或者唔係好多人明白「娥姐」陳玉娥參選新界東補選為乜，甚至一早認定佢係陪跑，但別人笑「娥」太瘋癲，「娥」笑他人看不穿，仲喺網絡儲到一定人氣。今次補選，得票數大躍進嘅娥姐亦堅持戰鬥到最後一刻，凌晨戴住黑超到點票中心，即使佢參選嘅新東係最快有結果選區，但係落敗嘅娥姐冇散水返屋企瞓覺，仲成功攝入建制派祝捷自拍合照中添。
話說九龍西補選由民建聯鄭泳舜勝出，替建制派取得補選零的突破，在場嘅建制派當然高興，立法會議員麥美娟等人都上台留影。
上台同鄭泳舜握手道賀
同一時間，「娥姐」突然走上台同鄭泳舜握手道賀，之後建制友玩自拍，娥姐仲加入佢哋。雖然無論企位、表情，佢同相中人流露嘅歡欣格格不入，但係娥姐天然呆嘅表情都幾搞笑。