政情：周一鑊耗盡儲備平機會食都冇味
平等機會委員會早年由「廢鑊」周一嶽擔任主席，多次被揭發浪費公帑，包括將辦事處設於租金高昂嘅太古城，消耗大量儲備，搞到接手主席嘅陳章明急急將辦事處搬去黃竹坑，以免出現財赤，不過佢同一眾同事就因此而無啖好食。
「廢鑊」周一嶽擔任平機會主席期間，無視租金高昂，將辦事處搬到太古城中心，結果租金不斷上升，呎租去到前年已經升至四十四點五元，舊年更漲至四十八元。平機會計計數，發現如果繼續租落去，去到一八/一九年將會耗盡儲備，嚇到現任主席陳章明立刻建議搬去租金水平較低嘅黃竹坑工業區。
根據平機會舊年向立法會提交嘅文件，政府畀佢哋嘅呎租補助金額係每呎二十二元，而睇番黃竹坑工業區附近寫字樓，呎租大約二十五元，比太古城平一大截，加埋政府補貼，相信可以慳番好多。
選擇少 得碟頭飯三文治
不過，平租嘅代價，就係冇啖好食。陳章明大吐苦水話，同以前喺太古城有美食廣場相比，工業區附近食肆選擇少得可憐，來來去去都係得碟頭飯同三文治，搬咗過去三個幾月已經食到厭。如果想食西餐，附近又得幾間價錢貴嘅餐廳，偶爾去幫襯還好，若當成飯堂就真係破產都似喇！所以佢哋惟有諗計應對，每星期有一、兩日調整午飯時間，等成班同事搭穿梭巴士去香港仔中心搵嘢食，認真慘情。
常塞車 棄自駕轉逼港鐵
除咗「搵食」艱難，交通方面亦係一大考驗。由於香港仔隧道繁忙時段經常大塞車，住銅鑼灣嘅陳章明亦被迫放棄揸車，要喺繁忙時間同人逼港鐵。唯一慶幸係辦公室離港鐵站唔算遠，只有五分鐘步程。「廢鑊」在位時亂使錢，離任後就「過咗海就神仙」，留低一堆蘇州屎畀繼任人處理，認真好帶挈嘞！