政情：廠商會團拜 高層齊唱新會歌
團拜活動無非係講吓祝福詞、舞吓獅同埋碰杯飲勝，中華廠商聯合會（廠商會）尋日舉行新春團拜就搞搞新意思，由會長吳宏斌帶領一眾副會長同高層一齊高歌，但唔係唱恭喜發財之類嘅應節歌曲，而係剛剛出爐嘅《廠商會之歌2018》。
特登早返練習
呢首歌係由廠商會前會長梁欽榮個仔兼會董梁啟洲作詞作曲，聽落旋律優美、易唱。點解要作隻會歌出嚟呢？吳宏斌笑笑口解畫話，廠商會原本就有會歌，但係比較難唱，所以佢就請自己人作隻新歌鼓勵吓廠佬喎，不過都唔會取代隻舊會歌嘅。
首歌早兩日先至起貨，仲未真正完成，連譜都未有，所以有份獻唱嘅高層尋日特登提早一個鐘返廠商會，由出晒名好唱得嘅行政總裁楊立門教唱。見大家都唱得有板有眼，不過好多時尾音只聽到楊立門把靚聲，不枉佢「AO歌王」嘅稱號喇！