政情：年桔有農藥 邱榮光勸勿醃製
唔少市民習慣喺農曆新年期間擺放年桔，但當正月十五一過就會棄掉。為咗減少浪費同為環保着想，有人就會將年桔加工醃製成鹹柑桔，但環保協進會總幹事邱榮光竟然大唱反調。
有機種植一年變可食用
點解呢？原來因為年桔種植期間被施加農藥，特別係其表面都會沾有唔少化學物質，令其外表更靚而適合做年花，所以將年桔加工成鹹柑桔，會將化學物品食咗落肚，難怪佢大叫唔好喇！
不過，邱榮光就話年桔可以回收，繼續種植再捐贈其他機構，下一年可再做年花，亦可以改用有機種植一年，咁樣就變成可以食用，亦都適合製作鹹柑桔，而佢都有醃鹹柑桔嘅習慣，因為沖水對喉嚨有益咁話。雖然佢有自家製鹹柑桔，但佢個仔邱亦聰就話從未飲用過鹹柑桔沖水。邱榮光就話阿仔喺外國讀書，所以生活習慣較西化。