政情：迪士尼連年虧蝕 田二少：港府捉鼠入米缸
香港迪士尼樂園由興建至今，港府一直「泵水」注資，至今已累積注資高達三百二十億元。不過，香港迪士尼樂園已連續第三年錄得虧損，港府仲話咁多年嚟從未獲樂園分紅，仲要注資去支持樂園，而另一邊廂，華特迪士尼就年年都索取專利同管理費用。就連早前自稱係迪士尼嘅擁躉嘅實政圓桌立法會議員田北辰（田二少）都喺社交網站鬧爆，批評政府根本就係捉老鼠入米缸，依家就搞到逐啲被陰乾喇！
田二少尋日喺社交網站度話，自己係迪士尼嘅「忠粉」，佢哋嘅《魔海奇緣》、《魔雪奇緣》及《漫威》都係佢同佢啲孫鍾意嘅。不過鍾意還鍾意，但都唔可以沉迷喺奇妙嘅世界，返番去現實，田二少就對政府同迪士尼嘅「不平等條約」勁嬲嬲豬。
繳管理費專利費造成虧蝕
事關迪士尼樂園要擴建先可以增加吸引力，而港府就要一直向樂園注資擴建，而不論樂園係盈係虧，都要向迪士尼美國總公司華特迪士尼繳付專利費同管理費，真係錢就港府出，着數就迪士尼美國總公司袋。
田二少就列出數字，指去年香港迪士尼蝕咗三億五千萬元，係二○一六年嘅一倍，但同時美國總部就抽走接近五億嘅管理費同專利費。而過去八年「呢條數更驚人」，香港迪士尼蝕咗九億五千萬元，而美國總部就抽咗三十四億元管理費同專利費。佢就批評政府「捉老鼠入米缸」，話冇理由呢個「不平等條約」可以無限期、千秋萬世咁延續，令港府蝕足一萬年，質疑港府點解冇後備方案，只係一味「泵錢」。
倡港府商討對沖平衡收支
被問到香港迪士尼樂園連年蝕錢，港府年年做水魚，佢會點樣狙擊政府。田二少就話海洋公園都會蝕，但因為冇專利費，所以唔係因為有人收咗錢而搞到蝕錢，香港迪士尼就正正係因為要畀專利費而搞到蝕錢。佢建議港府同美國迪士尼公司商討，香港迪士尼虧蝕時，就要用美國總部嘅專利費同管理費對沖虧蝕，確保香港迪士尼帳面收支平衡。佢又引述主責嘅商務及經濟發展局局長邱騰華話，要打破依家嘅不平等條約，就要等到迪士尼第二期用地擴建先有得傾喎。
學田二少話齋，要等到香港迪士尼擴建真係唔知何年何月，質疑政府政治掛帥，怕依家樂園蝕緊錢仲向立法會拎錢擴建會畀議員鬧，但佢就認為寧願加快第二期擴建先至係上策。如果港府唔主動出擊同迪士尼傾，真係唔知等到幾時，到時「米缸」都畀米奇老鼠陰乾咯！