中環出更：一舊雲「壞腦」 揭唔識打中文

一舊雲聽取預算案期間，曾兩度尋求他人協助，又向其座位上嘅電腦指指點點，睇嚟係電腦出現問題。而佢喺會後表示，當時想喺網上查閱司長嘅演詞，但電腦輸入法轉唔到英文，而日常用開嘅手寫板又不翼而飛，所以唔識打中文嘅佢就用唔到囉！

胡志偉響電話要離席聽

至於佢嘅黨友胡志偉，就喺會議上唔記得將手提電話轉為靜音模式，搞到喺會議廳內電話響要離位聽，但佢行咗幾步就收咗線返埋位。佢喺會後話經常出現唔記得將電話校響，又或者唔記得校震機，搞到不時會錯過來電。而佢當時就係接到貸款公司嘅來電，所以先可以迅速收線返埋位。

黃定光喺會上閉目養神，但其實亦曾多次寫字，未知是否記錄重點。（羅錦鴻攝）	張宇人亦耷低頭抖吓。（袁志豪攝）	許步明兩次高舉拇指，看似非常滿意丈夫表現。（陳宛彤攝）

張宇人易志明 睡魔急召

以往不時有議員受睡魔急召，被影到喺會議廳內嘅睡相。尋日就有多名議員被拍到閉目養神嘅相，好似身兼行政會議成員嘅張宇人、易志明等，而黃國健都多次除低眼鏡休息。黃定光亦多次托頭，但都喺座位上寫咗好耐字，唔知係咪認真聽取預算案並記錄重點咁專心喇。

陳茂波嘅太太許步明尋日都有到場支持丈夫，更以一身橙紅色外套示人，明顯配合預算案嘅封面。佢一到公眾席時就向丈夫揮手並高舉拇指，而聽取預算案時亦多次點頭，結束時亦落力拍掌，至於離開時被問會畀丈夫幾多分，佢又再次高舉拇指作回應，睇嚟真係非常滿意喎。

卓妮