一個屋企平時點亂都好，到咗新春佳節都係要打掃一番，令其煥然一新，「年廿八洗邋遢」就係咁解。香港就啱啱相反，新春期間衰到廢紙圍城，睇見都眼冤。喂，回收商就話過年收爐啫，唔通連食環署都暫停營業？
唔知大家出門拜年嗰陣，有冇留意周街都係廢紙皮同廢紙箱呢？好似西灣河東區走廊天橋底同埋太安樓對出街邊吖，廢紙皮堆積如山；又好似大埔昌運中心對出，一樣係紙皮紙箱遍地，而且呢啲都係冰山一角咋，基本上廢紙圍城已成為本港新春一大風景，問你服未。
回收商一早爆響口，講明新春前嘅內地廢紙回收配額已用完，新配額要等到下個月先至恢復，所以業界年廿九已急急收爐，仲話原本年廿七已想休市，但為咗將影響減至最低，先至捱義氣頂多兩日咋，估計新春期間本港會有兩萬噸廢紙無人處理，你話唔大鑊就假。
即係咁，回收商都係做生意嘅啫，既然配額用完，提早收爐都無可厚非。之但係食環署就唔同講法，明明負責全港街道清潔，任由廢紙圍城，竟然冇應變措施，點都講唔通喇。唔係咩，食環署係公營部門，唔同其他行業，新春無休係常識吧。再講吖，淨係短短幾日嘅年宵花市咋，已經製造咗三百幾噸垃圾，加上新春前後各家各戶唔係大掃除就係拜年送禮，製造嘅垃圾絕對唔嘢小，食環署學人齊齊收爐，廢紙逼爆街頭又有乜出奇。
話時話，食署官僚出晒名偷懶蛇王乜都齊，平時已經係咁，新春期間更加變本加厲，莫講話坐視廢紙圍城，對無牌小販擺賣阻街一樣熟視無睹，好似中環呢個金融心臟吖，新春期間被南亞小販公然佔領無牌擺賣，成個中環任佢哋打橫行咁款。食環署平時對住執紙皮阿婆喊打喊殺，唔知幾咁勇武，但對住呢班五大三粗嘅南亞裔就變晒鵪鶉，唔係欺善怕惡係乜呀。
咁當然，香港之所以搞到廢紙圍城，食署官僚失職固然難辭其咎，港府嘅回收政策天殘地缺先至係深層原因。當局講廢物回收大大話話講咗十幾廿年，之但係一直得把口，配套完全欠奉，廢紙多年來只靠回收商運返內地，隨着內地收緊環保政策，唔再乜嘢廢物都收，本港以鄰為壑呢招亦難再奏效，港府搞回收仲一味歎慢板，你急佢唔急咁款，有乜辦法唔一鑊泡吖。
當年法王路易十五話，「我死之後，哪管洪水滔天。」港產官僚其實都係一擔擔嘅咋，只要堆填區爆滿呢一日唔喺佢哋任內發生就關人個關，有人擔心香港總有一日變臭港、垃圾港，絕對唔係杞人憂天o架。