考吓大家，知唔知三月十三號係咩日子？當日係農曆正月廿六，亦係一年一度觀音開庫嘅日子，建議各位最好mark低日子，到時擔定櫈仔霸頭位。冇計喇，財爺今年「手緊兼口緊」，對於開倉紓困嘅民意呼聲，幾乎「有求必拒」，旨意佢不如旨意觀音好過！
聽吓波叔點講。佢尋日出席電台節目時呻到樹葉都落，話準備財政預算案遇到「好大挑戰」，又話今個財政年度盈餘雖然高，但未至於好似坊間估計咁高。雖然波叔唔肯講具體數目，但根據會計師公會估計今個財年政府盈餘達一千七百幾億元，就算打個五折都接近一千億，點計都唔係小數目，市民最想知道嘅始終係，政府庫房水浸，究竟會唔會同市民共享經濟成果？
睇怕大家都唔使有咩幻想囉。波叔講到明，社會對好似澳門政府嘅無針對性派錢措施有唔同聲音，要喺作出長遠投資同滿足社會期望之間取得平衡，投放資源必須未雨綢繆，例如改善醫院設施同做好社區醫療喎。
咁就好笑嘞，對於閣下適唔適合做財爺，社會上夠有「唔同聲音」啦，又唔見你從善如流退位讓賢！至於搵澳門派錢嚟比咯喎，更加係偷換概念。梳打埠亂象叢生，政府民意低殘，並唔係因為向市民派錢，而係因為澳產官僚管治能力低下，淨係海關一個衙門，又倒掛五星旗，又無理扣押旅客，衰嘢多到三日三夜都數唔晒，如果唔係政府年年派錢作為另類「維穩費」，澳門市民可能一早反咗枱喇！
睇番港府管治，同澳門比其實只係一百步笑五十步。包庇反中亂港洋奴漢奸，打爛法治之都金漆招牌呢筆唔講，齋講民生，枉波叔好意思話要未雨綢繆搞好醫療，正正因為港府冇因應人口老化，適時增加資源培訓醫療人手，結果每年流感高峰期，公立醫院例必做到冧廠；而長者宿位同社區照顧，就更加係僧多粥少，長期供不應求。港府施政無能，再唔派錢順吓市民條氣，因住爆大鑊吖！
好嘞，就算唔派錢，派吓糖得喇啩？嘥氣喇，波叔藉口多多，叫佢為公屋戶代繳租金，又話租戶有啲攞綜援，有啲要交稅，好難簡單歸納為同一類人，暗示今年冇得傾。至於影響最多打工仔嘅薪俸稅，波叔話明唔會調低標準稅率。照咁睇，退稅維持上年幅度，市民可能已經飲得杯落。
講到呢度，功夫茶想同班高官分享一個歷史故事。話說明神宗出名一毛不拔，邊患吃緊卻硬係唔肯揞私己錢做軍費，結果倉庫嘅金銀財寶氧化發霉，冇幾耐仲亡埋國。問你班港產官僚知驚未！