年關難過年年過。尋日大年初一，香港迎來史上第二暖和嘅春節，市民一家大細去林村許願，去尖沙咀睇花車巡遊，其樂融融。可惜現實中嘅香港政治不穩，法治淪喪，簡直係寒風陣陣，市民爭住移民，走唔甩嘅咪惟有苦中作樂囉！
數字唔會呃人，自一四年佔中之亂後，移居外地嘅港人數字直線上升，淨係一六年已經比一四年上升逾一成，其中最熱門目的地之一嘅加拿大，一六年人數更加比一五年上升接近一倍，都咪話唔得人驚。
歷史雖然驚人地相似，但唔會簡單地重複。睇番呢幾十年，每逢香港有親大鑊嘢，移民人數總係會隨之激增，九七前途談判、六四、沙士，無一例外。之不過今次有啲唔同，以往移民潮都係暫時現象，等香港風平浪靜，啲人又會紛紛回流，但依家引爆違法佔中嘅「雙學三子」獲終審法院放生，法治精神淪為笑話；律政司唔檢控涉及「黑金案」嘅漢奸黎及多名反對派政客，「廉潔」嘅核心價值亦告打柴，市民徹底心死，今次用腳投票，好可能一去冇回頭。
有頭髮冇人想做瘌痢，正如冇耐前「東方報業民意調查」顯示，大部分受訪者直指香港亂象叢生，令港人移民意欲大增，話香港地司法不公，政局不穩，市民難忍，移民急增，就係咁解。
除咗政局不穩，香港嘅教育亦出咗大問題，為人父母都想仔女專心學業，遠離政治污染，但睇番今時今日香港嘅大學校園，早就淪為少年政客培訓基地，教師不務正業，販賣「違法達義」歪理，誤人子弟；學生醉心政治鬥爭，甚至將「勇武抗爭」一套搬入校園，粗口爛舌批鬥師長，連當年紅衞兵都自嘆不如。年輕人唔使投身社會大染缸，一早已經喺校園學壞，唔怪得移民顧問公司近年接海外升學嘅生意接到手軟。
香港人嘅移民心態，一句講晒就係「唔理好醜，有得走就走」。較富裕嘅家庭選擇美、加、澳、英等國家；中產家庭揀新加坡、馬來西亞等地；經濟能力較低嘅，連台灣都唔放過，港人移民台灣，甚至上埋美國傳媒新聞，問你怕未。台灣有名畀你叫「呆灣」，「22K魔咒」、藍綠惡鬥，仲要周不時有重大天災，咁都爭崩頭，證明「一山還有一山低」，香港比台灣更絕望。
最值得憂慮嘅係，移民大軍嘅主力係介乎三十至五十歲嘅中產家庭。呢批人有錢有學識，係社會嘅中流砥柱，佢哋爭相跳船，勢必令香港人才進一步空洞化，競爭力每況愈下，想唔沉淪都幾難。
唔理係黃大仙「陶潛醉酒」嘅靈籤，抑或「危邦不入，亂邦不居」嘅傳統智慧，都顯示香港已由福地變亂地，走得摩冇鼻哥呀老友！