政情：有相為證：葉傲冬舉啞鈴 半裸露點
做男人最緊要擔得起，呢句說話工作適用、感情適用，估唔到健身都咁適用。油尖旺區議會主席葉傲冬喺社交網站上載舉啞鈴相，佢半裸上身，仲要露點添！睇嚟對自己嘅身材相當有自信。
葉傲冬曾經肥過，近年就迷上健身，不時都會上載健身照片到社交網站分享，身形都明顯清減唔少，成個形象完全唔同晒。
睇番佢今次上載嘅照片，半裸蹲喺地下，雙手舉啞鈴，留意番，尋日嘅最低氣溫唔夠十度，佢竟然可以唔着衫同淨係着短褲！原來對抗嚴寒天氣，唔單止可以靠羽絨，仲可以靠一個七十磅嘅啞鈴！
70磅啞鈴舉到O嘴
七十磅即係等同幾包八公斤米咁重，正常人抬一包米都覺得唔容易，難怪葉傲冬另一張相都舉到O晒嘴，佢自己都hashtag話「點解好似好重咁」，不過佢都有寫初見成效，相信佢都頂得住嘅！