中環出更：以為「局長未到」肥尹被寸唔留心
立法會大會尋日首條口頭質詢係由民主黨尹兆堅（肥尹）提出，關注政府以私人遊樂場地契（私契）批地畀私人會所，點知佢一起身提問就話「局長未到」，而負責回應質詢嘅民政事務局局長劉江華其實坐定定喺度，立法會主席梁君彥就寸肥尹唔留心先睇唔到局長喎。
質疑高球會使用率
尋日大會緊接住特首答問會開始，當一眾官員正離開會議廳嘅時候，梁君彥立即宣布大會開始叫肥尹提問，肥尹一起身就話「主席啊，局長未到」，而劉江華就一臉茫然，舉手示意再點一點自己示意在位，梁君彥就隨即話「如果議員畀啲留心呢，就知道官員一早坐咗喺度」，肥尹就反駁話自己好留心，「喺兵荒馬亂嘅情況下，你叫我就起身，望吓見唔到局長咪出聲囉！」
而備受關注、租約期將喺明年屆滿嘅粉嶺高爾夫球場，劉江華話高球會舊年嘅數字顯示，全年有十二萬場運動，其中五萬場為非會員活動。肥尹就話按數字計一日有三百二十九場運動，公眾場佔一百九十二場，質疑係咪真係做得到。
喺質詢時間屆滿時，商界嘅議員林健鋒就話要申報，「我打足球、打羽毛球、打乒乓球、打網球，係多間會所嘅會員，又係高爾夫球會會員」，喺佢未申報完嘅時候，代主席李慧琼就叫停咗佢。
卓妮